شہریار آفریدی کشمیر کمیٹی کے چیئرمین منتخب، اجلاس سے اپوزیشن کا واک آؤٹ

0
18




چیئرمین کشمیر کمیٹی کے انتخاب پر اتفاق رائے قائم کرنے میں ناکام ہوئی، شہریار آفریدی کو تجربہ نہیں کہ انہیں کشمیر کمیٹی کا چیئرمین بنایا جائے: اپوزیشن کا مؤقف— فوٹو:فائل

وزیر مملکت برائے انسداد منشیات شہریار آفریدی پارلیمانی کمیٹی برائے کشمیر کے چیئرمین منتخب ہوگئے۔

فخر امام نے وفاقی وزیر بننے کے بعد چیئرمین کشمیر کمیٹی کے عہدے سے استعفیٰ دے دیا تھا جس کے بعد ان کی جگہ شہریار آفریدی کو پارلیمانی خصوصی کمیٹی برائے کشمیر میں شامل کیا گیا تھا۔

آج پارلیمانی کمیٹی برائے کشمیر کا اجلاس ہوا جس میں شہریار آفریدی کو چیئرمین منتخب کیا گیا تاہم اس دوران اپوزیشن ارکان نے اجلاس کا بائیکاٹ کردیا۔

کمیٹی میں شامل مسلم لیگ (ن) کے رکن سینیٹر مشاہد اللہ خان کا کہنا تھا کہ اپوزیشن نے پارلیمانی کشمیر کمیٹی کے اجلاس کا بائیکاٹ کیا، حکومت بغیر اتفاق کے کشمیر کمیٹی کے چیئرمین کا انتخاب کروانا چاہتی تھی اور چیئرمین کشمیر کمیٹی کے انتخاب پر اتفاق رائے قائم کرنے میں ناکام ہوئی۔

انہوں نے کہا کہ کشمیر پر حکومت غیر سنجیدہ ہے، دنیا نے پاکستانی مؤقف سے آنکھیں موند لی ہیں، شہریار آفریدی کو تجربہ نہیں کہ انہیں کشمیر کمیٹی کا چیئرمین بنایا جائے۔

ان کا کہنا تھا کہ فخر امام پر کوئی اعتراض نہیں کیا تھا لہٰذا حکومت کسی بھی تجربہ کار کو نامزد کرے۔

پیپلزپارٹی کی رہنما شیری رحمان کا اجلاس کے بعد گفتگو میں کہنا تھا کہ پارلیمانی کمیٹیاں ہمارے لیے بہت اہمیت کی حامل ہوتی ہیں اور ہر پارلیمانی روایت کو حکومت توڑ رہی ہے جس کے باعث ہمیں مجبوراً پارلیمانی کشمیر کمیٹی سے واک آؤٹ کرنا پڑا۔

انہوں نے کہا کہ کشمیر کمیٹی اہم ترین ہے اور ہمیشہ سے کشمیر کمیٹی کے چیئرمین کا اتفاق رائے سے انتخاب کیا گیا لیکن حکومت پارلیمان کو تباہ کرتی جارہی ہے۔

شیری رحمان کا کہنا تھا کہ حکومت چیئرمین کشمیر کمیٹی کے عہدے کیلئے  اتفاق رائے پیدا نہیں کرسکی، مسلم لیگ ن، پیپلزپارٹی اور جے یو آئی نے مطالبہ کیا کہ چیئرمین کشمیر کمیٹی پر اتفاق پیدا کریں۔

خیال رہے کہ پارلیمانی کمیٹی برائے کشمیر میں قومی اسمبلی اور سینیٹ کے ارکان شامل ہیں۔ 





Source link

LEAVE A REPLY

Please enter your comment!
Please enter your name here