شہباز شریف نے درجنوں کمپنیاں اپنے ملاز مین کے نام پر بنائی ہیں، شہزاد اکبر

0
17


وزیراعظم عمران خان کے معاون خصوصی برائے احتساب شہزاد اکبر کا کہنا ہے کہ  شہباز شریف نے درجنوں کمپنیاں اپنے ملازمین کے نام پر بنائی ہیں۔

اسلام آباد میں پریس کانفرنس کرتے ہوئے شہزاد اکبر کا کہنا تھا کہ  شہباز شریف کے جن ملازمین کے نام پرکمپنیاں بنائی گئیں ان کی تنخواہیں 18 ہزار سے 70 ہزار تک ہیں اور ثبوت کے طور پر چیک کی کاپیاں بھی موجود ہیں۔

معاون خصوصی برائے احتساب نے بتایا کہ شریف فیڈ مل اور  رمضان شوگر مل کے ملازموں کے نام پر کمپنی بنائی گئی، اور رقم منتقل کی گئی، اس کے علاوہ چنیوٹ پاور کے ملازم اور ماڈل ٹاؤن رہائش کے چپڑاسی کے نام پر بھی کمپنی بنائی گئی۔

ان کا کہنا تھا کہ سب ملازمین کے بے نامی اکاؤنٹس میں 17 ارب 40کروڑ روپے جمع ہوئے جب کہ یہ سب ملازمین ان کے ہیں اور ایمپلائز اولڈ ایج بینیفٹس انسٹی ٹیوشن (ای او بی آئی) میں رجسٹرڈ ہیں، ایک 18 ہزار روپے ماہانہ تنخواہ والے ملازم کے اکاؤنٹ میں 450 ملین ٹرانسفر کیے گئے ۔

وزیراعظم کے معاون خصوصی کا کہنا تھا کہ یہ تمام شواہد نیب کے پاس موجود ہیں، نیب کو چاہیے یہ مقدمہ تیار ہے اسے فائل کرے، یہ تمام تحقیقات ہو چکی ہیں، میرے اختیار میں گرفتاری نہیں ہے، اگر میں نے غلط بیانی کی ہے تو شہباز شریف بے شک لندن میں مقدمہ کریں میں تیار ہوں۔

شہزاد اکبر کا کہنا تھا کہ جو شواہد ان کے خلاف ہیں اس سے ان کا بچنا ممکن نہیں، یہ میں نہ مانوں کی رٹ جتنی چاہیں لگالیں، ثبوت سامنے آچکے ہیں، 10 سال میں اس خاندان کے اثاثوں میں ہو شربا اضافہ ہوا ہے۔

‘ آپ نے کہا تھامجھے لندن کی سڑکوں پرگھسیٹیں گے ‘

معاون خصوصی نے شہباز شریف کو مخاطب کرتے ہوئے کہا کہ آپ نے کہا تھا کہ مجھے لندن کی سڑکوں پر گھسیٹیں گے لیکن ایسا تو کچھ نہیں ہوا، آپ نےکہا تھا کہ ایک دھیلے کی کرپشن ثابت ہو تو سیاست چھوڑ دوں گا،اب اس سے زیادہ آپ کو کتنے ثبوت چاہئیں۔

انہوں نے کہاکہ  یہ باہر کہتے ہیں میرے بچے ہیں اور قومی احتساب بیورو (نیب) کے سامنے کہتے ہیں کہ وہ بالغ ہیں میرا کوئی تعلق نہیں،جیسے ہی گرم ہوا چلتی ہے یہ لندن بھاگ جاتے ہیں اور اب گرم ہوا آنے والی ہے۔

نواز شریف کے حوالے سے شہزاد اکبر  کا کہنا تھا کہ کورونا سے پہلے لمحہ بہ لمحہ پلیٹیلیٹس کا کاؤنٹ چل رہا تھا لیکن نہ تو اب علاج اور نہ آپریشن کی کوئی خبر آرہی ہے ، 3 ماہ ہوگئے لیکن نوازشریف کا آپریشن نہ ہوا، کورونا کا علاج تو ملا نہیں مگر لگتا ہے ان کا علاج مل گیا ہے۔





Source link

LEAVE A REPLY

Please enter your comment!
Please enter your name here