انڈین ہیکرز نے پاکستانی اعلٰی عہدیداروں کے ای میلز ہیک کیے: رپورٹ

برطانوی اخبار سنڈے ٹائمز اور غیر سرکاری تنظیم بیورو آف انویسٹی گیٹو جرنلزم کی تحقیقاتی رپورٹ کے مطابق انڈین ہیکرز کے ایک گروپ نے پاکستانی سیاستدانوں، عسکری عہدیداروں اور سفارتکاروں کے ذاتی ای میلز اور بات چیت کی جاسوسی کی ہے۔

رپورٹ کے مطابق ہیکرز نے انڈین خفیہ ادارے کے احکامات پر درجنوں ہائی پروفائل پاکستانی عہدیداروں کے ای میلز کو نشانہ بنایا ہے۔

تحقیقاتی رپورٹ کے مطابق معاشی سرگرمیوں کے مرکز ’دی سٹی آف لندن‘ سے منسلک نجی تفتیش کاروں نے انڈیا سے تعلق رکھنے والے کمپیوٹر ہیکرز کے ایک گروپ کو برطانوی کاروباری شخصیات، سرکاری عہدیداروں اور صحافیوں کی جاسوسی کے لیے استعمال کیا۔

اخبار سنڈے ٹائمز اور غیر سرکاری تنظیم بیورو آف انویسٹی گیٹو جرنلزم کو انڈین ہیکرز کے اس گروپ کے ڈیٹا بیس تک رسائی دی گئی ہے جس سے معلوم ہوا ہے کہ غیر معمولی نوعیت کے سائبر حملے کیے گئے۔

ڈیٹا بیس سے معلوم ہوا کہ ہیکرز نے آمرانہ حکومتوں، برطانوی وکلا اور ان کے مالدار کلائنٹس کے احکامات پر ایک سو سے زائد نجی ای میل اکاؤنٹس کو نشانہ بنایا۔

رپورٹ کے مطابق ہیکرز نے بظاہراً انڈین خفیہ ادارے کے احکامات پر پاکستانی سیاستدانوں، جرنیلوں اور سفارتکاروں کے کمپیوٹرز کو ہیک کیا اور ان کی ذاتی بات چیت کی بھی جاسوسی کی۔

پاکستانی عہدیداروں میں سابق صدر جنرل پرویز مشرف بھی شامل ہیں۔

ہیکرز نے رواں سال 10 جنوری کو تحریک انصاف کے رہنما فواد چوہدری کا ای میل اکاؤنٹ بھی ہیک کیا تھا جب وہ بطور وزیر اطلاعات فرائض انجام دے رہے تھے۔

رپورٹ میں کہا گیا ہے کہ ’ہیکرز نے مال ویئر کے ذریعے سابق وزیر اطلاعات کے کمپیوٹرز کو ہیک کیا اور اعلٰی جرنیلوں کے علاوہ بیجنگ، شنگھائی اور کھٹمنڈو میں سفارتخانوں کو بھی نشانہ بنایا۔‘

یہ پہلی مرتبہ ہے کہ ہیکنگ کی غرض سے ہائر کیے جانے والے کسی ایسے گروپ کے اندرونی معاملات سے متعلق معلومات تک میڈیا کو رسائی ملی ہے جن میں متعدد مجرمانہ سازشوں کا انکشاف ہوا ہے۔ 

’وائٹ انٹ‘ نامی یہ ہیکنگ گینگ انڈیا کے دارالحکومت نئی دہلی سے ملحق شہر ’گروگرام‘ میں واقع ایک اپارٹمنٹ سے اپنے تمام آپریشنز چلاتا ہے۔

ہیکنگ گروپ کے ماسٹر مائنڈ 31 سالہ ادتیا جین ہیں جو انڈیا میں برطانوی اکاؤنٹسی فرم ڈیلائٹ میں بھی ملازمت کرتے ہیں۔

ادتیا جین سات سال سے ہیکنگ نیٹ ورک چلا رہے ہیں جن کی خدمات برطانوی نجی جاسوسوں نے ای میل اکاؤنٹس ہیک کرنے کے لیے حاصل کیں۔

ادتیا جین کی ٹیم نے جاسوسی کا سافٹ ویئر استعمال کرتے ہوئے متعلقہ افراد کے کمپیوٹر کے کیمروں اور مائیکرو فون کا کنٹرول حاصل کیا جس سے وہ باتیں سننے کے علاوہ حرکات پر بھی نظر رکھ سکتے تھے۔