انڈیا کی ریاست گجرات میں پل گرنے سے 60 افراد ہلاک، درجنوں لاپتہ

انڈیا کی ریاست گجرات میں برطانوی دور کا پل گرنے سے 60 افراد ہلاک ہوگئے ہیں۔

انڈین ٹی وی چینل این ڈی ٹی وی کے مطابق گجرات کے علاقے موربی میں پل ٹوٹنے سے 100 سے زائد افراد دریا میں گر گئے۔

رپورٹس کے مطابق ابھی تک درجنوں افراد لاپتہ ہیں جن کی تلاش جاری ہے۔

دوسری جانب گجرات کی حکومت نے پل گرنے کی ذمہ داری قبول کر لی ہے۔

سو سال سے زیادہ قدیم پل کو کچھ عرصہ ٹریفک کے لیے بند کر دیا گیا تھا۔  تاہم پل کو مرمت اور تزئین و آرائش کے بعد چار دن قبل کھولا گیا تھا۔

ریاستی وزیر محنت برجیس مرجا کا کہنا ہے کہ پل کی گذشتہ ہفتے مرمت کی گئی تھی۔ ’پل گرنے پر ہم خود حیران ہیں اور اس معاملے کی تحقیقات کر رہے ہیں۔‘

رپورٹ کے مطابق گرتے وقت پل پر 500 کے قریب افراد موجود تھے

انڈین وزیراعظم نریندر مودی، جو کہ خود بھی آج گجرات میں موجود ہیں، نے فوری طور پر ریسکیو آپریشن شروع کرنے کی ہدایت کر دی۔

وزیراعظم مودی نے گجرات کے وزیراعلی بھوپندر پٹیل سے ربطہ کیا اور واقعے کی تفصیلات حاصل کی۔

گجرات کے وزیر داخلہ پرش سنگاوی واقعے کی اطلاع ملتے ہی موبی کی طرف روانہ ہوگئے ہیں۔  رپورٹ کے مطابق پل درمیان سے ٹوٹ گیا ہے۔ 

پرائم منسٹر ریلیف فنڈ سے دو لاکھ انڈین روپے فی کس امداد ہلاک ہونے والے افراد کے لواحقین کے لیے اعلان کیا گیا ہے۔

دوسری جانب گجرات کی حکومت نے ہلاک ہونے والے ہر فرد کے اہلخانہ کے لیے چار لاکھ روپے امداد کا اعلان کیا ہے۔

موربی پل ایک تاریخی پل ہے جس کی تعمیر کئی دہائی پہلے کی گئی تھی۔ صرف چار دن قبل مذکورہ پل کو مرمت اور تزئین و آرائش کے بعد ٹریفک کے لیے کھول دیا گیا تھا۔