استعفوں کی تصدیق کے لیے سپیکر کو خط لکھ رہے ہیں: فواد چوہدری

سابق وفاقی وزیر اور پاکستان تحریک انصاف کے رہنما فواد چوہدری نے حکومت پر ’جھوٹ بولنے‘ کا الزام لگاتے ہوئے کہا ہے کہ پی ٹی آئی کے مستعفی ہونے والے ارکان کو تنخواہ نہیں مل رہی۔

جمعرات کو ایک ٹویٹ بیان میں فواد چوہدری نے کہا کہ ’کل سپریم کورٹ میں کہا گیا کہ تحریک انصاف کے ارکان اسمبلی (میں) نہیں آ رہے لیکن تنخواہ لے رہے ہیں۔‘

ان کا کہنا تھا کہ ’جج صاحبان کو میڈیا پر آنے والی ہر خبر کو پہلے تصدیق کے عمل سے گزارنا چاہیے۔ حقیقت یہ ہے کہ یہ ایک اور حکومتی جھوٹ تھا۔‘

ان کے مطابق ’مستعفی ارکان کی تنخواہیں معطل ہیں اور کسی رکن کو تنخواہ نہیں مل رہی۔‘

فواد چوہدری نے مزید بتایا کہ ’آج سپیکر کو خط لکھا جا رہا ہے اور کہا ہے کہ وقت بتائیں کب ممبران اسمبلی اپنے استعفوں کی تصدیق کے لیے ایک بار پھر آپ کے پاس آئیں تاکہ نیا انتخابی عمل شروع کیا جا سکے۔‘

خیال رہے کہ رواں برس اپریل میں اس وقت کے وزیراعظم عمران خان کے خلاف تحریک عدم اعتماد کے موقع پر پی ٹی آئی کے تمام ارکان نے استعفے دے دیے تھے، جن میں سے بعدازاں چند کو سپیکر قومی اسمبلی نے منظور کیا تھا اور ان نشستوں پر ضمنی انتخابات کرائے گئے تھے۔